Преподобнаго Нестора Российской Летописец.
Повесть времянных лет.
Сыновья Ноевы…
…по разделении языка, прияша сынове Симовы восточныя страны, а Хамовы сынове полуденныя страны, Афестовых сынове западныя страны прияша, и полунощныя страны. От сих же семидесяти и дву языку бысть язык Словенск от племениж Афетова, нарицаеми Норици, иже суть Словене. По мнозех же временех сели суть Словене по Дунаеви, где есть Угорская земля, и болгарская земля; и от тех Словен разыдошась по земли, и прозвашась имены своими, где седши на каком месте, якож пришедше седоша на реце, имянем Морава, и прозвашась Морава; а друзии Чеси нарекошась; а се тииже Словене Хоргаги белии, и Серб, и Хорутане.
Волохом бо нашедшим на Словены на Дунайские, и седшим в них, и насилящим им, Словенеж они пришедше седоша на Висле, и прозвашась Ляхове; а от тех Ляхов прозвашась Поляне Ляхове, друзии Лутичи, инии Мазовшане, инии Поморяне. Також и тии Словене пришедше и седоша по Днепру, и нарекошась Поляне, а друзии Древляне, зане седоша в лесах, а друзии седоша межи Припятью и Двиною, и нарекошась Дрегвичи; инии седоша на Двине, и нарекошась Полочане, реки ради, яже течет в Двину, именем Полота; от сея прозвашась Полочане. Словене же седоша около озера Ильменя, и прозвашась своим имянем, и соделаша город, и нарекоша Новъ город; а друзии седоша по Десне, и по Семи, и по Суле, и нарекошась Севера; и тако разыдеся Словенский язык, темже и прозвася грамота...
...Кию же пришедшу в свой град Киев, и ту сконча живот свой, и брат его Щек, и Хорив, сестра их Лыбедь ту скончашась. И по сей братьи почаша держати род их княжение в Полях, а в Деревех свое, а Дрегвичи свое; а Словене свое в Ноъгороде, а другое на Полоте, иже Полочане, от них же и Кривичи седят на верх Волги, и на верх Двины, и на верх Днепра, их же град есть Смоленск. Ту бо седят Кривичи, таже Севера от них; на Беле озере седят Весь, а на Ростове озере Меря, а на Клещине озере седят Меряж; а по Оце реце, где втечет в Волгу, язык свой Мурома; Черемиса свой язык; Мордва свой язык. Се бо токмо Словенский язык в Руси: Поляне, Древляне, Новгородцы, Полочане, Дрегвичи, Северо-бужане, зане седят по Бугу последи Волынцы.
И се суть инии языцы, иже дань дают Руси: Чудь, Весь, Меря, Мурома, Черемиса, Ямь, Мордва, Печера, Литва, Зимегола, Корсь, Нерома, Ливь, суть свой язык имуще от колена Афетова, иже живут на странах полунощных. Словенску же языку, якоже рекохом, живущим на Дунаи, приидоша от Скиф, рекше от Козар, рекомии болгари и седоша по Дунаеви, и насильницы Словенам быша...
...По сем приидоша Угре белии, и наследиша землю Словенску, прогнавши Волохи, иже беша преже прияли землю Словенску...
Обри воеваша на Словены, и примучиша Дулебы, сущие Словены, и насилие творяху женам Дулебским...
...Бяху бо Обри телом велици, а умом горди; и потреби я Бог, и помроша вси, и не оста их ни един Обрин, и есть притча в Руси и до сего дни: Погибоша аки Обри, их же несть ни племени наследок...
...По сих бо приидоша Печенези, и паки идоша Угре мимо Киев. Послеж при Олезе Поляном живущим особе, якоже рекохом, от рода Словенска сущим, нарекошась Поляне, а Деревляне от Словен же, и нарекошась Деревляне. Радимичи бо и Вятичи от Ляхов: бяста бо два брата в Ляхох, Радим, а другий Вятко, и пришед седоста Радим на Соже, и прозвашась Радимичи; а Вятко с родом своим седе по Оце, от него прозвашась Вятичи. И живяху в мире Поляне, и Деревляне, и Севера, и Радимичи, и Вятичи, и Хорвати. и Дулебы живяху по Бугу; а Лутичи и Тиверци седяху по Бугу и по Днестру олии до моря; и суть грады их и до сего дни, и зовяхусь от Грек великая Скиф.
Имяху бо обычаи свои, и закон отец своих и предания. Кождо свой нрав имяху...
...И идоша за море к Варягом Руси; сице бо тии звахусь Варязи Русь, яко се друзии зовутся Свие, друзииж Урмяни, Ингляне, друзии Готе. Тако же реша Руси, Чюдь и Словене, и Кривичи и вси: ”Земля наша велика и обильна, а народа в ней нет; да пойдете у нас княжити и володети”.
И избрашась трие братья с роды своими, и пояша собе всю Русь, и приидоша к Словеном перьвое, и срубиша город Ладогу, и седе в Ладозе старей Рюрик, а другий Синеус седе у нас на Беле озере, а третий Трувор в Исборску; и от тех Варяг прозвася Руская земля Новгород. Тии суть людие Новгородцы от рода Варяжска; преж бо беша Словене до Рюрика нарекошася.
По двое же лету умре Синеус, и брат его Трувор. И прия всю власть Рюрик один, и пришед ко Илменю, и сруби городок над Волховом, и прозва Новгород, и седее ту княжа, раздая волости мужем своим, и городы рубити, овому Полотеск, овому Ростов, другому Белоозеро, и по тем городом находницы суть Варязи, а первыи насельницы в Новъгороде Словене, в Полоцку Кривичи, в Ростове Меря, в Белеозере Весь, в Муроме Мурома, и теми всеми обладаше Рюрик.